ឯកឧត្តមទេសរដ្ឋមន្ត្រី ស៊ុន ចាន់ថុល ជួបពិភាក្សាការងារជាមួយឯកអគ្គរដ្ឋទូតអេហ្សីបប្រចាំកម្ពុជា
06-November-2015 | ដោយ មួយឡា
ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួបសម្តែងការគួរសមពីសំណាក់ឯកឧត្តម Hazem El Tahry ឯកអគ្គរដ្ឋទូតនៃសាធារណៈរដ្ឋអារ៉ាប់អេហ្សីបប្រចាំកម្ពុជា នាថ្ងៃទី០៥ ខែវិច្ឆិកា ឆ្នាំ២០១៥ នៅទីស្តីការ ក្រសួងពាណិជ្ជកម្ម។
ឯកឧត្តមឯកអគ្គរដ្ឋទូត បានសម្តែងអំណរគុណ និងការកោតសរសើរ ចំពោះឯកឧត្តមទេសរដ្ឋមន្ត្រី ដែលបានផ្តល់កិច្ចស្វាគមន៍យ៉ាងកក់ក្តៅ និងការអញ្ជើញចូលរួមជាអធិបតីរបស់ឯកឧត្តមទេសរដ្ឋមន្ត្រីនាពេលថ្មីៗនេះ នៅក្នុងពិធីសម្ភោធដាក់ឲ្យប្រើប្រាស់ ព្រែកជីកផ្លូវសមុទ្រស៊ុយអេថ្មី (Suez Canal) របស់ប្រទេសអេហ្សីប ដែលបានប្រព្រឹត្តទៅនៅទីក្រុង Cairo ប្រទេសអេហ្សីប។
ឯកឧត្តមឯកអគ្គរដ្ឋទូត បានជម្រាបជូនឯកឧត្តមទេសរដ្ឋមន្ត្រី អំពីការធ្វើឲ្យធូរស្រាលនូវស្ថានភាពនយោបាយនៅប្រទេសអេហ្សីប និងការប្តេជ្ញារបស់ខ្លួនក្នុងការជួយជ្រោមជ្រែងជំរុញកិច្ចសហប្រតិបត្តិការបន្ថែមរវាងកម្ពុជា និងអេហ្សីប។
ឯកឧត្តមទេសរដ្ឋមន្ត្រី ស៊ុន ចាន់ថុល បានជម្រាបជូន ឯកឧត្តមឯកអគ្គរដ្ឋទូត អំពីកិច្ចខិតខំប្រឹងប្រែងរបស់ក្រសួងពាក់ព័ន្ធ នឹងកិច្ចសម្រួលពាណិជ្ជកម្ម និងការវិនិយោគនៅកម្ពុជា និងការត្រៀមខ្លួនរបស់កម្ពុជាសម្រាប់សហគមន៍សេដ្ឋកិច្ចអាស៊ាន។
ឯកឧត្តមទេសរដ្ឋមន្ត្រី បានសម្តែងការកោតសរសើរ ចំពោះការប្តេជ្ញា របស់ឯកឧត្តមឯកអគ្គរដ្ឋទូត ក្នុងការធ្វើឲ្យប្រសើរឡើង ដល់ទំនាក់ទំនងរវាងប្រទេសទាំងពីរ និងបានមានប្រសាសន៍ថា៖ ឯកឧត្តម រង់ចាំបំពេញការងារយ៉ាងជិតស្និទ្ធ ជាមួយឯកអគ្គរដ្ឋទូតអេហ្សីប ក្នុងការពង្រីកទំហំពាណិជ្ជកម្ម និងការវិនិយោគរវាងប្រទេសទាំងពីរ៕
ប្រភព៖ ទំព័រក្រសួងពាណិជ្ជកម្ម
ចំនួនអ្នកទស្សនា
- ថ្ងៃនេះ2381
- ម្សិលមិញ15681
- សប្តាហ៍នេះ61221
- ខែនេះ83101
- ឆ្នាំនេះ83101
- សរុប20525557